اول مقابلة لبنت

عارف انك أكيد أول ما قريت اسم الموضوع افتكرتها مشكلة عاطفية..

وعارف ان في مشرفين كان يادوب خلاص اهم..بيضغطوا على زرار النقل وهينقلوا الموضوع لقسم المشاكل العاطفية..

لكن الموضوع مش كده..الموضوع بالعكس خالص

الموضوع ده معمول عشانك انت..عشان آدم

المفروض انه هيبقى بداية سلسلة مواضيع كتير ان شاء الله

بعد اكتر من رد في كذا موضوع..ابرزهم موضوع ميزو...:https://dvd4arab.maktoob.com/showthre...2291064&page=2

قررت أكتب عن الحاجات دي بالتفصيل..

لسه لحد السطر ده في ناس مش فاهمين الموضوع عن ايه بالظبط..

الموضوع باختصار..هحاول افهمك فيه ايه الي بتعمله غلط..ايه الي بتقوله غلط للبنت..مع انك شايفه صح من وجهة نظرك انت

ساعات كتير لما بتبقى عايز تشد بنت ليك..بتفكر تعمل ايه..
تفكيرك غالباً بيكون انك تبقى "لطيف" معاها..ما تقولهاش لأ على اي حاجة..هتقولها لأ ازاي دي ممكن تزعل منك..هتطيرها من ايديك؟

طبعاً دي البداية..بعد كده هتفكر انك تكلمها كل يوم..تبعتلها مسدجات رومانسية - ده لو عرفت تجيب رقمها بأسلوبك ده- وتحاول تجيبلها هدايا كتير..

تمام..فكرت بالطريقة دي ؟

كويس جداً..مبروك عليك الفشل يا ريس..!

باختصار، لو فكرت بالطريقة دي..وعملت كده، يبقى كده انت بتقولها " هاي..أنا زي أي حد انتي ممكن تعرفيه "..أو
" أنا بحاول اشتريكي بالهدايا الكتير عشان مش قادر أشدك ليا بشخصيتي ".. أحسن الفروض الي ممكن تحصلك..انك هتتحط في خانة "الصديق" الي لو جيت في يوم انت صرحتلها انك بتحبها..هتقولك انا طول عمري بعاملك كأخ..!

بص يا باشا..انسى كل الكلام ده..انسى طريقة تفكيرك دي خالص..

لما تتعامل مع بنت ما تفكرش كراجل لبنت...مشكلتك انك بتفكر هيا هتشوف الي انت بتعمله ده ازاي بس من وجهة نظرك انت..مش من وجهة نظرها هيا كبنت..يعني باختصار

لما تعمل أي حاجة او تقول أي حاجة..تفكر كبنت لراجل..هتستقبلها هيا ازاي أو هتشوفها ازاي أو هتسمعها ازاي..

لازم تحترم تفكير البنات..وتعرف انه مختلف عنك كراجل تماما..!

المشكلة يا باشا ان عشان تفهم مخ البنت لازم تفكر كبنت..آه تفكر كبنت، احنا بنحب الكورة وهما بيحبوا برامج المكياج والجمال والموضة، احنا بنحب المال والأعمال وهما بيحبوا أخبار الفنانات..احنا بنعتقد - خطأ - إن أنجح طريق هوا الطريق المستقيم، هما شايفين ان الرجل الدوغري - وما تزعلش مني - راجل ممل، مفيش في العلاقة معاه أي حاجة ممتعة..أي حاجة Interesting .. مفيش أي حاجة تخليها تستنى المرة الجاية هتشوفك امتى..ببساطة شايفين ان الراجل الدوغري راجل تقليدي..لازم يبقى في علاقتك شوية لعب وشوية تجديد..

ما لقيتش أنسب من الكلام الي فات ده اختم النقطة دي بيه.. الكلام ده قولته على فكرة قبل كده هنا : المشاركة يبقى اول نقطة..تفكر كبنت لراجل..مش كراجل لبنت.. تاني نقطة..، كتير من الرجالة..في كلامها مع أي بنت بتشوف ايه الكلام الحلو وتدور عليه وتقوله..ايه الكلام اللطيف الي ممكن أقولهولها عشان تعرف اني جنتل مان ؟؟.. لأ غلط..! هتقولي امال اقولها ايه ..أقولها كلام رخم ؟ آه قول كلام رخم..! بس مش رخم رخم..لأ قول كلام دمه خفيف..بس في نفس الوقت تريقة خفيفة عليها..اتريق على مشيتها بخفة دم..اتريق على نضارتها بخفة دم برده..البنت ما تحبش الراجل الدوغري في الكلام..البنت تحب الراجل الي تحس ان في العلاقة معاه في حاجة ممتعة..في حاجة Interesting.. تخليها تستنى المرة الجاية هتشوفك امتى..وهتوديها فين..وهتقولها ايه.. انما ايه الجديد لو كل مرة خرجتوا قعدت تقولها كلام حلو.. دي بنت..الكلام الحلو سمعته 5000 مرة.. مرة تانية بقولك ما تخليش نفسك في نظرها حد عادي..ما تبقاش ممل يا أخي .. يعني مثلاً..كلمة بقولها لكل الي بيسألوني نقول ايه واحنا ماشيين مع بنت..في حاجات كتير تقولها..يعني مثلاً: لما تكون ماشي مع بنت..تقول على فكرة انا بحب أمشي معاكي جداً..لما تضحك وتقول ليه..تقولها بتفكريني بمشية جدتي الله يرحمها..كنت بحبها أوي.. طبعاً انت فاكر ان كلام زي ده هيضايقها..مش هيضايقها ما تخافش..بالعكس..جرب انت أي حاجة زي دي..ابدأ بكلمة حلوة خفيفة كده..وبعدين اتريق تريقة خفيفة برده وشوف النتيجة وفي كلام كتير ممكن يتقال..لاحظ البنت الي معاك بتقول ايه أو لابسة ايه..البنت دايماً تحب تكون مميزة ولابسة عالأقل..حاجة واحدة مميزة، أو عالأقل مميزة ليها شخصياً. خلي بالك ان أول تريقة بخفة دم - زي ما اتفقنا - بتقولها للبنت..بتعرفك البنت دي طبيعتها ايه..وبعد كده تعرف تزود التريقة شوية..ولا تزود الضحك شوية..، ساعات هتقابل بنات بتحب تتكلم جد على فكرة..وهتقولك انها بتحب تتكلم جد..، مش معنى كده انك تكلمها بوش خشب وتتكلم جد على طول..الكلام الجد ده برده كل فترة قول تريقة عليه..وأهم حاجة، ما تقولش كلمة تضحك وتضحك انت عليها..ما تبقاش عامل زي الي قال نكته وهوا أول واحد ضحك عليها..! يبقى تاني نقطة..خليك مميز..، وما تخافش مش هتضايق منك. بعد كده بقى تالت نقطة.. انت ليه بتفكر انك لو قولت حاجة ضايقتها انها هتطير من ايدك..ليه شايف نفسك انك ما تقدرش بشخصيتك تشد أي حد ليك..سواء دي او غيرها..ليه شايف ان مفيش قدامك الا فرصة واحدة..الي هيا البنت دي؟ الحكاية دي بتضايق البنات جداً..ان لو عرفوا ولد..يلاقوه بيحاول يقرب منهم بسرعة..شوية شوية يقولها بحبك..! صحيح في بنات بتتلذذ بكده..انها تشد الولد ليها لغاية ما تخليه يحبها..انت ازاي تقع ؟!! ليه كل ما تتعرف على بنت تخليها هيا محور حياتك ؟ BE A MAAAAAAN المشكلة دي متعلقة بغريزة البقاء الي جوا كل واحد فينا..بس عقلك برمجها غلط..باختصار ان الإنسان بيتمسك بالفرصة الي قدامه عشان خايف تروح منه ويضطر يشوف غيرها.. حتى لو مفيش نصيب والبنت دي قطعت علاقتها بيك..ايه المشكلة؟ انت راجل وعارف انك حياتك مش هتقف على دي..انت راجل وعارف انك بشخصيتك تشد أي حد ليك..حط ده في دماغك واقتنع بيه.. ما تتنازلش عن رجولتك بإنك تحسسها ان حياتك مفيهاش غيرها هيا..وكل ما تعمل حاجة تاخد رأيها أعمل ايه.. المصيبة ان في ولاد..بيقولوا لأي بنت يكلموها: انتي بقيتي كل حاجة في حياتي..ما بقتش أفكر غير فيكي .. والمصيبة أكتر ان هما بيقولولها كده حتى وهما مفيش بينهم حب..!! حسس البنت الي معاك انها مع راجل..في حياته اختيارات كتير زي ما هيا في حياتها اختيارات..وما تسألهاش كل شوية اعمل ايه وما أعملش ايه.. يبقى تالت نقطة..: Have options..يعني خلي ليك بدائل واختيارات..ما تخليش نفسك حكر لحد. بعد كده بقى.. لما تكونوا خارجين ما تقولهاش ها تحبي نروح فين..ولما تروحوا ما تقولهاش ها تحبي ناكل ايه..!! ما تقولش اصلاً رايحين فين..خلي كل حاجة هتعملها معاها هيا مستنياها هتبقى ايه..، لما تروحوا مطعم تتغدوا أو تتعشوا ما تقولهاش تاكل ايه..اطلب لنفسك وقولها هطلبلك كذا.. لو مش عاجبها الي طلبتهولها ما تخافش..هتقولك لأ مش بحب ده.. يا باشا ما تحسسهاش انها هيا الراجل وان هيا الي هترتب يومكوا..إزاي هتحس انك راجل وتحب تخرج معاك بعد كده وتقرب ليك اكتر..وتتطمن انك هتعرف تقود العلاقة معاها في حياتكوا الجاية كلها..وانت مش عارف تقود يوم واحد بس..! وكمان لما تكونوا خارجين ما تعرفهاش البرنامج كله بتاع اليوم ايه..، ما تقولهاش هنروح الاول نتغدى في المطعم ده..وبعدين نتمشى شوية على الكورنيش..وبعدين نروح المكان ده..وبعدين بقى ندخل فيلم تامر حسني الجديد.. مبروك..ادتلها تقرير اليوم خلاص؟؟ انت كده كإنك بتاخد الإذن من والدتك عشان تخرج..! خلي الخروجة بالنسبالها عفوية..مفاجأة..، ولما تسألك هنروح فين بعد كده قولها مش هقولك..ماتخافش ، قولها مش هقولك..خليها مفاجأة.. خلي بالك ما بقولكش استبد برأيك..وقولها يا كده يا بلاش..لأ، لو هيا اعترضت على حاجة احترم رأيها وناقشها فيه.. يبقى كده فهمنا مع بعض ان رابع نقطة هي انك انت الي تقود العلاقة..وتعرف تاخد قراراتك لواحدك..أمال انت راجل ليه؟ بالمناسبة..في كتاب هينزل قريب ان شاء الله، اتكتب خلاص وسجلت حقوقه الفكرية..ويادوب عالطبع والنشر ان شاء اللهوكمان في سيمينار مصغر كده في سيلنترو في المعادي يوم الجمعة ان شاء الله..هنتكلم عن الحاجات دي بالتفصيل..وفي ناس هتيجي هنتكلم عن مشاكل كتير زي مشكلة لخوف..وليه في ناس بتخاف لما تكلم بنت ما تعرفهاش..وهنتكلم في أكبر مشكلة بتشغل كل الرجالة: "أقول ايه"..وحاجات تانية كتير..الحضور مجانا ما تخافوش :Dالي عايز ييجي يعرفني برايفت عشان أقوله المعاد.. يلا أسيبك مع النقط دي تفهمها شوية..واقراها أكتر من مره.. وأشوفك في موضوع تاني